nahin khane ka ghar mein ab koi saman le de kar
nahīñ khāne kā ghar meñ ab koī sāmān le de kar
uThānā paḌ gayā āḳhir tirā ehsān le de kar
yahāñ har gaam par mushkil koī darpesh aa.ī hai
faqat ik maut hī aa.ī nazar āsān le de kar
kamāyā kuchh nahīñ achchhā 'amal is dār-e-fānī meñ
faqat pahlū meñ rakkhā hai dil-e-vīrān le de kar
maiñ jis ke vāste chīḳhūñgā chillā.ūñgā jalse meñ
karegā kyā faqat ik jhuuT kā e'lān le de kar
baḌā bebāk shā'ir hai giraftārī zarūrī hai
kisī din aa hī jā.egā koī farmān le de kar
tire bachchoñ ko bahlānā mire do vaqt kī roTī
tirā ghar chhoḌ jā.ūñgā maiñ bhā.ī-jān le de kar
kisī kī sard-mehrī ne hameñ behāl kar Daalā
hameñ karnī paḌī hai zindagī qurbān le de kar
añdheroñ kī hukūmat hai tanazzul kā zamāna hai
hameñ ġhāroñ pe lā.eñge siyāsat-dān le de kar
kahā bhaa.ī ne 'hasrat' aao ghar taqsīm karte haiñ
mire hisse meñ aayā hai faqat dālān le de kar
nahin khane ka ghar mein ab koi saman le de kar
uThana paD gaya aaKHir tera ehsan le de kar
yahan har gam par mushkil koi darpesh aai hai
faqat ek maut hi aai nazar aasan le de kar
kamaya kuchh nahin achchha 'amal is dar-e-fani mein
faqat pahlu mein rakkha hai dil-e-viran le de kar
main jis ke waste chiKHunga chillaunga jalse mein
karega kya faqat ek jhuT ka e'lan le de kar
baDa bebak sha'ir hai giraftari zaruri hai
kisi din aa hi jaega koi farman le de kar
tere bachchon ko bahlana mere do waqt ki roTi
tera ghar chhoD jaunga main bhai-jaan le de kar
kisi ki sard-mehri ne hamein behaal kar Dala
hamein karni paDi hai zindagi qurban le de kar
andheron ki hukumat hai tanazzul ka zamana hai
hamein ghaaron pe laenge siyasat-dan le de kar
kaha bhai ne 'hasrat' aao ghar taqsim karte hain
mere hisse mein aaya hai faqat dalan le de kar
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.