tujh sa jahan mein fitna-e-dauran na tha kabhi

tujh sā jahāñ meñ fitna-e-daurāñ na thā kabhī

is darja koī dushman-e-īmāñ na thā kabhī

vo 'ishrat-e-junūñ kā zamāna bhī yaad hai

dāman na thā kabhī to garebāñ na thā kabhī

sahrā ko le chalī hai hameñ vahshat-e-ḳhayāl

jaise hamāre ghar meñ bayābāñ na thā kabhī

aksar vafā pe apnī nadāmat huī bahut

lekin maiñ is qadar bhī pashemāñ na thā kabhī

kuchh yuuñ sukūt-e-marg hai bahr-e-hayāt meñ

jaise ye vaqf-e-mauja-e-tūfāñ na thā kabhī

rāh-e-vafā meñ luTtā rahā hai 'razā' mudām

ye shaḳhs varna hātim-e-daurāñ na thā kabhī

tujh sa jahan mein fitna-e-dauran na tha kabhi

is darja koi dushman-e-iman na tha kabhi

wo 'ishrat-e-junun ka zamana bhi yaad hai

daman na tha kabhi to gareban na tha kabhi

sahra ko le chali hai hamein wahshat-e-KHayal

jaise hamare ghar mein bayaban na tha kabhi

aksar wafa pe apni nadamat hui bahut

lekin main is qadar bhi pasheman na tha kabhi

kuchh yun sukut-e-marg hai bahr-e-hayat mein

jaise ye waqf-e-mauja-e-tufan na tha kabhi

rah-e-wafa mein luTta raha hai 'raza' mudam

ye shaKHs warna hatim-e-dauran na tha kabhi