tamam shahr ki nazren hain us KHazane par

tamām shahr kī nazreñ haiñ us ḳhazāne par

jahāñ hai baiThā huā saañp ik dahāne par

'abas hai DhūñDnā bastī jo merā maskan thī

huī thī aag kī bārish mire Thikāne par

ye saañs apnī kahāñ hai ki dastaras meñ rahe

charāġh-e-hastī havāoñ ke hai nishāne par

haiñ koshisheñ ki bujhe aag shahr-e-dil kī magar

havā ba-zid hai ise aur bhī jalāne par

muhīb raat kī koī sahar nahīñ hotī

to phir ye kaisī chamak hai siyāh-ḳhāne par

maiñ dāstān sahī harf harf sach lekin

yaqīn karnā paḌegā mire fasāne par

'adū kī chaal huī kāmyāb kuchh aisī

lagā hai ḳhvāb meñ bhī mujh ko āzmāne par

huuñ ḳhāksār mirī ḳhaak ḳhaak duniyā hai

milegī ḳhaak kī sauġhāt āstāne par

tamam shahr ki nazren hain us KHazane par

jahan hai baiTha hua sanp ek dahane par

'abas hai DhunDna basti jo mera maskan thi

hui thi aag ki barish mere Thikane par

ye sans apni kahan hai ki dastaras mein rahe

charagh-e-hasti hawaon ke hai nishane par

hain koshishen ki bujhe aag shahr-e-dil ki magar

hawa ba-zid hai ise aur bhi jalane par

muhib raat ki koi sahar nahin hoti

to phir ye kaisi chamak hai siyah-KHane par

main dastan sahi harf harf sach lekin

yaqin karna paDega mere fasane par

'adu ki chaal hui kaamyab kuchh aisi

laga hai KHwab mein bhi mujh ko aazmane par

hun KHaksar meri KHak KHak duniya hai

milegi KHak ki saughat aastane par