maut mere sar pe jab manDlaegi

maut mere sar pe jab mañDlā.egī

naav sāhil par bhañvar ban jā.egī

phuul ban jā.egī patthar sī vo baat

jo tire hoñToñ se ho kar aa.egī

chāñd merī gard hai taare ḳhayāl

dil kī betābi kahāñ le jā.egī

tū ne dekhā hai mujhe jis aag meñ

tere dāman tak bhī vo aa jā.egī

vo kalī kyā muskurā.egī jise

sehn-e-gulshan se ḳhizāñ le jā.egī

merī āñkhoñ se lahū bahtā rahe

dil kī dhaḌkan aur kyā samjhā.egī

maiñ nishān-e-rāh ban jā.ūñ 'zafar'

zindagī ab aur kis kaam aa.egī

maut mere sar pe jab manDlaegi

naw sahil par bhanwar ban jaegi

phul ban jaegi patthar si wo baat

jo tere honTon se ho kar aaegi

chand meri gard hai tare KHayal

dil ki betabi kahan le jaegi

tu ne dekha hai mujhe jis aag mein

tere daman tak bhi wo aa jaegi

wo kali kya muskuraegi jise

sehn-e-gulshan se KHizan le jaegi

meri aankhon se lahu bahta rahe

dil ki dhaDkan aur kya samjhaegi

main nishan-e-rah ban jaun 'zafar'

zindagi ab aur kis kaam aaegi