ek hunar hai jo kar gaya hun main

ik hunar hai jo kar gayā huuñ maiñ

sab ke dil se utar gayā huuñ maiñ

kaise apnī hañsī ko zabt karūñ

sun rahā huuñ ki ghar gayā huuñ maiñ

kyā batā.ūñ ki mar nahīñ paatā

jīte-jī jab se mar gayā huuñ maiñ

ab hai bas apnā sāmnā dar-pesh

har kisī se guzar gayā huuñ maiñ

vahī nāz-o-adā vahī ġhamze

sar-ba-sar aap par gayā huuñ maiñ

ajab ilzām huuñ zamāne kā

ki yahāñ sab ke sar gayā huuñ maiñ

kabhī ḳhud tak pahuñch nahīñ paayā

jab ki vaañ umr bhar gayā huuñ maiñ

tum se jānāñ milā huuñ jis din se

be-tarah ḳhud se Dar gayā huuñ maiñ

kū-e-jānāñ meñ sog barpā hai

ki achānak sudhar gayā huuñ maiñ

ek hunar hai jo kar gaya hun main

sab ke dil se utar gaya hun main

kaise apni hansi ko zabt karun

sun raha hun ki ghar gaya hun main

kya bataun ki mar nahin pata

jite-ji jab se mar gaya hun main

ab hai bas apna samna dar-pesh

har kisi se guzar gaya hun main

wahi naz-o-ada wahi ghamze

sar-ba-sar aap par gaya hun main

ajab ilzam hun zamane ka

ki yahan sab ke sar gaya hun main

kabhi KHud tak pahunch nahin paya

jab ki wan umr bhar gaya hun main

tum se jaanan mila hun jis din se

be-tarah KHud se Dar gaya hun main

ku-e-jaanan mein sog barpa hai

ki achanak sudhar gaya hun main