falak par shor-e-be-hangam kyun hai

falak par shor-e-be-hangām kyuuñ hai

dil-e-be-kaif par ilhām kyuuñ hai

har ik jānib hai vahshat kā baserā

yahāñ dahshat meñ merī shaam kyuuñ hai

bahak jaatā hai jo pī kar hamesha

usī kī dastaras meñ jaam kyuuñ hai

kahīñ par jumbish-e-lab besh-qīmat

kahīñ ḳhūn-e-jigar be-dām kyuuñ hai

nisāb-e-dars meñ shāmil hai lekin

vafā-dārī bahut gumnām kyuuñ hai

mohabbat hai fareb-e-'ālam-e-rang

magar ye dil fareb-e-dām kyuuñ hai

jahālat be-zamīrī aur tamalluq

dar-e-jānāñ pe ye sab 'aam kyuuñ hai

ḳhudā-e-vāhid-o-qahhār-o-bar-haq

yahāñ iz.hār-e-haq dushnām kyuuñ hai

farishto jaao ab pūchho ḳhudā se

zamīñ par aaj qatl-e-'ām kyuuñ hai

yahāñ neze pe kyoñ hai ibn-e-haidar

yazīdoñ kā bhalā ikrām kyuuñ hai

shikāyat hai lab-e-mai-kash pe 'akram'

yahāñ pī kar koī nākām kyuuñ hai

falak par shor-e-be-hangam kyun hai

dil-e-be-kaif par ilham kyun hai

har ek jaanib hai wahshat ka basera

yahan dahshat mein meri sham kyun hai

bahak jata hai jo pi kar hamesha

usi ki dastaras mein jam kyun hai

kahin par jumbish-e-lab besh-qimat

kahin KHun-e-jigar be-dam kyun hai

nisab-e-dars mein shamil hai lekin

wafa-dari bahut gumnam kyun hai

mohabbat hai fareb-e-'alam-e-rang

magar ye dil fareb-e-dam kyun hai

jahaalat be-zamiri aur tamalluq

dar-e-jaanan pe ye sab 'am kyun hai

KHuda-e-wahid-o-qahhaar-o-bar-haq

yahan izhaar-e-haq dushnam kyun hai

farishto jao ab puchho KHuda se

zamin par aaj qatl-e-'am kyun hai

yahan neze pe kyon hai ibn-e-haidar

yazidon ka bhala ikram kyun hai

shikayat hai lab-e-mai-kash pe 'akram'

yahan pi kar koi nakaam kyun hai