falak ki gardishen aisi nahin jin mein qadam Thahre

falak kī gardisheñ aisī nahīñ jin meñ qadam Thahre

sakūñ dushvār hai kyūñkar tabī'at koī dam Thahre

qazā ne dostoñ se dekhiye āḳhir kiyā nādim

kiye the 'ahd-o-paimāñ jis qadar vo kul 'adam Thahre

chhuā tū ne jise maarā use ai afa.ī-e-gesū

ye sab tiryāq mere tajraba karne meñ sam Thahre

kiyā jab ġhaur kosoñ duur niklī manzil-e-maqsad

kabhī gar pā-e-shal uTThe to chal kar do qadam Thahre

lagā kar dil judā honā na thī shart-e-vafā sāhab

ġham-e-furqat kī shiddat se karam jaur-o-sitam Thahre

jo kuchh dekhā vo ā.īna thā aane vaalī hālat kā

jahāñ dekhā yahī āñkhoñ ke kāñse jām-e-jam Thahre

'amal kahne pe apne hazrat-e-vā'iz kareñ pahle

gunah ke mo'tarif jab haiñ to vo kab mohtaram Thahre

javānī kī siyah-mastī meñ vasf-e-zulf likkhā thā

baḌhā vo silsila aisā ki ham mushkīñ qalam Thahre

ye sābit hai ki mutlaq kā ta.ayyun ho nahīñ saktā

vo sālik hī nahīñ jo chal ke tā-dair-o-haram Thahre

bashar ko qaid-e-kulfat māya-e-andoh-o-āfat hai

rahe achchhe jo is mehmāñ-sarā meñ aa ke kam Thahre

'habīb'-e-nā-tavāñ se rāh-e-ulfat tai nahīñ hotī

'ajab kyā gar ye rasta jāda-e-mulk-e-adam Thahre

falak ki gardishen aisi nahin jin mein qadam Thahre

sakun dushwar hai kyunkar tabi'at koi dam Thahre

qaza ne doston se dekhiye aaKHir kiya nadim

kiye the 'ahd-o-paiman jis qadar wo kul 'adam Thahre

chhua tu ne jise mara use ai afai-e-gesu

ye sab tiryaq mere tajraba karne mein sam Thahre

kiya jab ghaur koson dur nikli manzil-e-maqsad

kabhi gar pa-e-shal uTThe to chal kar do qadam Thahre

laga kar dil juda hona na thi shart-e-wafa sahab

gham-e-furqat ki shiddat se karam jaur-o-sitam Thahre

jo kuchh dekha wo aaina tha aane wali haalat ka

jahan dekha yahi aankhon ke kanse jam-e-jam Thahre

'amal kahne pe apne hazrat-e-wa'iz karen pahle

gunah ke mo'tarif jab hain to wo kab mohtaram Thahre

jawani ki siyah-masti mein wasf-e-zulf likkha tha

baDha wo silsila aisa ki hum mushkin qalam Thahre

ye sabit hai ki mutlaq ka tayyun ho nahin sakta

wo salik hi nahin jo chal ke ta-dair-o-haram Thahre

bashar ko qaid-e-kulfat maya-e-andoh-o-afat hai

rahe achchhe jo is mehman-sara mein aa ke kam Thahre

'habib'-e-na-tawan se rah-e-ulfat tai nahin hoti

'ajab kya gar ye rasta jada-e-mulk-e-adam Thahre