wafa ka nishan sach ka meyar hain hum

vafā kā nishāñ sach kā me'yār haiñ ham

mah-e-ḳhūñ sar-e-matla'-e-dār haiñ ham

jo rakhte haiñ garm-e-fuġhāñ be-basoñ ko

unhī sard jazboñ kā iz.hār haiñ ham

giraftār ḳhud jis meñ husn-e-azal hai

usī karb ke ā.ina-dār haiñ ham

añdheroñ ke jangal meñ haiñ pā-shikasta

magar ‘āzim-e-shahr-e-anvār haiñ ham

jo 'unvān-e-taslīm-o-tā'zīm Thahre

vo kirdār-e-tamsīl-e-pindār haiñ ham

sar-e-rāh-e-dil haath phailā.e kab se

tire muntazir misl-e-ashjār haiñ ham

hamārā muqaddar hai shām-e-ġharībāñ

ki sub.h-e-tarab ke 'azādār haiñ ham

dayār-e-haqā.eq ko jaa.eñ to kaise

asīrān-e-zindān-e-afkār haiñ ham

fazā dekh kar kohr-ālūd 'tā.ib'

ḳhilāf-e-tabī’at sharar-bār haiñ ham

wafa ka nishan sach ka me'yar hain hum

mah-e-KHun sar-e-matla'-e-dar hain hum

jo rakhte hain garm-e-fughan be-bason ko

unhi sard jazbon ka izhaar hain hum

giraftar KHud jis mein husn-e-azal hai

usi karb ke aaina-dar hain hum

andheron ke jangal mein hain pa-shikasta

magar ‘azim-e-shahr-e-anwar hain hum

jo 'unwan-e-taslim-o-ta'zim Thahre

wo kirdar-e-tamsil-e-pindar hain hum

sar-e-rah-e-dil hath phailae kab se

tere muntazir misl-e-ashjar hain hum

hamara muqaddar hai sham-e-ghariban

ki subh-e-tarab ke 'azadar hain hum

dayar-e-haqaeq ko jaen to kaise

asiran-e-zindan-e-afkar hain hum

faza dekh kar kohr-alud 'taib'

KHilaf-e-tabi’at sharar-bar hain hum