hai mariz-e-gham pareshan chaaragar mohtat hai

hai marīz-e-ġham pareshāñ chāragar mohtāt hai

jāntā hai vo 'ilāj-e-ġham magar mohtāt hai

ab hamāre darmiyāñ majbūriyāñ haiñ is qadar

maiñ idhar mohtāt huuñ aur vo udhar mohtāt hai

ehtiyātan aap haiñ mohtāt so shikva nahīñ

haañ magar ye kyā ki ham se shahr bhar mohtāt hai

avval avval to bahut thī ārzū-e-indimāl

ab masīhāoñ se bhī zaḳhm-e-jigar mohtāt hai

pahle qirtās-o-qalam kī koī hājat hī na thī

baat kaise ho ki ab un kī nazar mohtāt hai

baam par ik roz aane se vo afsāne bane

chaudhvīñ kī shab meñ bhī merā qamar mohtāt hai

pārsā logoñ ke naam us ko zabānī yaad haiñ

bol saktā hai tirā 'az.har' magar mohtāt hai

hai mariz-e-gham pareshan chaaragar mohtat hai

jaanta hai wo 'ilaj-e-gham magar mohtat hai

ab hamare darmiyan majburiyan hain is qadar

main idhar mohtat hun aur wo udhar mohtat hai

ehtiyatan aap hain mohtat so shikwa nahin

han magar ye kya ki hum se shahr bhar mohtat hai

awwal awwal to bahut thi aarzu-e-indimal

ab masihaon se bhi zaKHm-e-jigar mohtat hai

pahle qirtas-o-qalam ki koi hajat hi na thi

baat kaise ho ki ab un ki nazar mohtat hai

baam par ek roz aane se wo afsane bane

chaudhwin ki shab mein bhi mera qamar mohtat hai

parsa logon ke nam us ko zabani yaad hain

bol sakta hai tera 'azhar' magar mohtat hai