jazbaat mein shiddat ka asar ab bhi wahi hai
jazbāt meñ shiddat kā asar ab bhī vahī hai
āñkhoñ meñ mirī shām-o-sahar ab bhī vahī hai
go ab vo mulāqāt kī sūrat nahīñ baaqī
dar-parda 'ināyat kī nazar ab bhī vahī hai
tum bhuul gaye ho to hameñ bhī nahīñ kuchh yaad
haañ ik ḳhalish-e-shauq magar ab bhī vahī hai
manzil pe pahuñch kar bhī huuñ taskīñ se bahut duur
betābi-e-tahrīk-e-safar ab bhī vahī hai
zulmāt-e-shab-e-ġham meñ koī farq na aayā
pābandī-e-ummīd-e-sahar ab bhī vahī hai
jazbaat mein shiddat ka asar ab bhi wahi hai
aankhon mein meri sham-o-sahar ab bhi wahi hai
go ab wo mulaqat ki surat nahin baqi
dar-parda 'inayat ki nazar ab bhi wahi hai
tum bhul gaye ho to hamein bhi nahin kuchh yaad
han ek KHalish-e-shauq magar ab bhi wahi hai
manzil pe pahunch kar bhi hun taskin se bahut dur
betabi-e-tahrik-e-safar ab bhi wahi hai
zulmat-e-shab-e-gham mein koi farq na aaya
pabandi-e-ummid-e-sahar ab bhi wahi hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
