ek raat aapne ummid pe kya rakkha hai

ek raat aap ne ummīd pe kyā rakkhā hai

aaj tak ham ne charāġhoñ ko jalā rakkhā hai

sausan o nastaran o sumbul o raihān o gulāb

terī yādoñ ko gulistāñ meñ chhupā rakkhā hai

vaj.h-e-āvārgī-e-ishq-e-fasurda ma.alūm

nigah-nāz ko parda sā banā rakkhā hai

dard daulat hī sahī pahlū-e-rāhat hī sahī

kuchh dinoñ ishq ne bhī ḳhud ko bachā rakkhā hai

le uḌe ahl-e-junūñ husn kī ik ek adā

ḳhalvat o bazm meñ ab farq hī kyā rakkhā hai

haa.e ḳhushbū se tire dard kī nisbat na ga.ī

maiñ ne har phuul ko siine se lagā rakkhā hai

aaj to shikva-e-mahrūmī-e-dīdār nahīñ

ham ne kal ke liye is ġham ko uThā rakkhā hai

ek raat aap ne ummid pe kya rakkha hai

aaj tak hum ne charaghon ko jala rakkha hai

sausan o nastaran o sumbul o raihan o gulab

teri yaadon ko gulistan mein chhupa rakkha hai

wajh-e-awargi-e-ishq-e-fasurda malum

nigah-naz ko parda sa bana rakkha hai

dard daulat hi sahi pahlu-e-rahat hi sahi

kuchh dinon ishq ne bhi KHud ko bacha rakkha hai

le uDe ahl-e-junun husn ki ek ek ada

KHalwat o bazm mein ab farq hi kya rakkha hai

hae KHushbu se tere dard ki nisbat na gai

main ne har phul ko sine se laga rakkha hai

aaj to shikwa-e-mahrumi-e-didar nahin

hum ne kal ke liye is gham ko uTha rakkha hai