teri baaten sunai ja rahi hain

tirī bāteñ sunā.ī jā rahī haiñ

ye āñkheñ ḳhvāb le ke aa rahī haiñ

hamāre rāste uljhā rahī haiñ

tirī āñkheñ hameñ bahkā rahī haiñ

mire andar sharāroñ kī nadī hai

so mujh par titliyāñ kyuuñ gā rahī haiñ

javānī meñ hī ḳhud ko kho gaye ham

hameñ andar se bāteñ khā rahī haiñ

tirī yādeñ fazā meñ aa ga.iiñ so

ghaTā.eñ āsmāñ par chhā rahī haiñ

kahānī meñ to kuchh badlā nahīñ hai

na.ī qisteñ dikhā.ī jā rahī haiñ

ravayya un kā behtar ho rahā hai

tirī ġhazleñ asar dikhlā rahī haiñ

ye yak-tarfa nizām-e-'adl kab tak

yahāñ kī 'aurateñ uktā rahī haiñ

chhuḌānā chāhte haiñ haath mujh se

adā.eñ aap kī batlā rahī haiñ

ye rishta 'umr bhar kā hai hamārā

bhalā phir aap kyuuñ sharmā rahī haiñ

teri baaten sunai ja rahi hain

ye aankhen KHwab le ke aa rahi hain

hamare raste uljha rahi hain

teri aankhen hamein bahka rahi hain

mere andar shararon ki nadi hai

so mujh par titliyan kyun ga rahi hain

jawani mein hi KHud ko kho gaye hum

hamein andar se baaten kha rahi hain

teri yaaden faza mein aa gain so

ghaTaen aasman par chha rahi hain

kahani mein to kuchh badla nahin hai

nai qisten dikhai ja rahi hain

rawayya un ka behtar ho raha hai

teri ghazlen asar dikhla rahi hain

ye yak-tarfa nizam-e-'adl kab tak

yahan ki 'auraten ukta rahi hain

chhuDana chahte hain hath mujh se

adaen aap ki batla rahi hain

ye rishta 'umr bhar ka hai hamara

bhala phir aap kyun sharma rahi hain