tamanna ke tarannum par ghazal-go bhi nahin nikla

tamannā ke tarannum par ġhazal-go bhī nahīñ niklā

bahut taḌpāyā us ne ek aañsū bhī nahīñ niklā

charāġhoñ kī tamannā thī tujhe ai zulmat-e-qismat

añdhere kā vo 'ālam thā ki jugnū bhī nahīñ niklā

maiñ apnī zaat ke zindāñ meñ barsoñ qaid thā aise

kisī khiḌkī se bāhar merā baazū bhī nahīñ niklā

chalo maanā ki tū ne bhī anā kā paas rakkhā hai

usī kī be-niyāzī thī ki kam tū bhī nahīñ niklā

mujhe bhī aatā thā āġhosh lag kar hausla denā

mire andar se merā apnā vo rū bhī nahīñ niklā

maiñ us ke jism kī tafsīr kartā hī rahā shab bhar

magar us nāf-e-tābāñ se vo jaadū bhī nahīñ niklā

ḳhudā se bahs karte the shab-e-hijrāñ kī ḳhalvat meñ

sanam tū bhī nahīñ niklī miyāñ tū bhī nahīñ niklā

bahut hasrat thī is dil ko laboñ ko kaaT khāne kī

mire hoñToñ pe the vo lab maiñ chābū bhī nahīñ niklā

tamanna ke tarannum par ghazal-go bhi nahin nikla

bahut taDpaya us ne ek aansu bhi nahin nikla

charaghon ki tamanna thi tujhe ai zulmat-e-qismat

andhere ka wo 'alam tha ki jugnu bhi nahin nikla

main apni zat ke zindan mein barson qaid tha aise

kisi khiDki se bahar mera bazu bhi nahin nikla

chalo mana ki tu ne bhi ana ka pas rakkha hai

usi ki be-niyazi thi ki kam tu bhi nahin nikla

mujhe bhi aata tha aaghosh lag kar hausla dena

mere andar se mera apna wo ru bhi nahin nikla

main us ke jism ki tafsir karta hi raha shab bhar

magar us naf-e-taban se wo jadu bhi nahin nikla

KHuda se bahs karte the shab-e-hijran ki KHalwat mein

sanam tu bhi nahin nikli miyan tu bhi nahin nikla

bahut hasrat thi is dil ko labon ko kaT khane ki

mere honTon pe the wo lab main chabu bhi nahin nikla