kaise keh dun ki be-qarar hun main

kaise keh duuñ ki be-qarār huuñ maiñ

ḳhud se lipTī huī bahār huuñ maiñ

mujh se vābasta hai dayār-e-dil

'ahd-e-māzī kī yādgār huuñ maiñ

vo na hotā to surḳh-rū hotā

us ke hone se sharmsār huuñ maiñ

jo rafīq-e-safar sā lagtā hai

rāste kā vahī ġhubār huuñ maiñ

ek muddat se huuñ maiñ Thahrā huā

dekhne meñ to ābshār huuñ maiñ

'ishq huuñ ġhaur se mujhe dekho

jo na utre vahī ḳhumār huuñ maiñ

hālat-e-dil tire tavassut se

āb-dīda huuñ ashk-bār huuñ maiñ

ḳhush-gumānī hai aur kuchh bhī nahīñ

kishvar-e-dil kā tājdār huuñ maiñ

kaise keh dun ki be-qarar hun main

KHud se lipTi hui bahaar hun main

mujh se wabasta hai dayar-e-dil

'ahd-e-mazi ki yaadgar hun main

wo na hota to surKH-ru hota

us ke hone se sharmsar hun main

jo rafiq-e-safar sa lagta hai

raste ka wahi ghubar hun main

ek muddat se hun main Thahra hua

dekhne mein to aabshaar hun main

'ishq hun ghaur se mujhe dekho

jo na utre wahi KHumar hun main

haalat-e-dil tere tawassut se

aab-dida hun ashk-bar hun main

KHush-gumani hai aur kuchh bhi nahin

kishwar-e-dil ka tajdar hun main