kaf-e-imkan pe KHayalat ki lau mein ghul kar

kaf-e-imkāñ pe ḳhayālāt kī lau meñ ghul kar

maiñ nayā rang banā rang-e-numū meñ ghul kar

ye ḳhalal kaun-o-makāñ ko hī bahā le jaatā

maiñ bahak jaatā agar sail-e-subū meñ ghul kar

merī tafhīm se vāzeh hue ye arz-o-samā

raushnī 'aks huī mere lahū meñ ghul kar

jaise aflāk meñ ajrām banāte haiñ jagah

tū bhī chamkā mire afkār kī lau meñ ghul kar

daad hai us ke fan-e-baḳhiya-garī ko 'tauhīd'

zaḳhm tattō sā huā tār-e-rafū meñ ghul kar

kaf-e-imkan pe KHayalat ki lau mein ghul kar

main naya rang bana rang-e-numu mein ghul kar

ye KHalal kaun-o-makan ko hi baha le jata

main bahak jata agar sail-e-subu mein ghul kar

meri tafhim se wazeh hue ye arz-o-sama

raushni 'aks hui mere lahu mein ghul kar

jaise aflak mein ajram banate hain jagah

tu bhi chamka mere afkar ki lau mein ghul kar

dad hai us ke fan-e-baKHiya-gari ko 'tauhid'

zaKHm tattoo sa hua tar-e-rafu mein ghul kar