jahan kahin dil-e-be-kal ka karwan Thahra

jahāñ kahīñ dil-e-be-kal kā kārvāñ Thahrā

pa.e-nigār-e-shabistān-e-gul-ruḳhāñ Thahrā

ḳhirad shu'ūr kī had se nikal ke nāchtī hai

junūñ tilism-gah-e-raqs-e-bismilāñ Thahrā

shikast dil ko bahar-taur haath aa.egī

jo faisla dil-o-dilbar ke darmiyāñ Thahrā

tire firāq meñ ho yā mirī judā.ī meñ

mujhe amaañ na milī tū bhī be-amāñ Thahrā

lahū lahū kiye jaatā hai merī miTTī ko

mire liye mirā aañsū vabāl-e-jāñ Thahrā

maiñ dāstān-e-ġham-e-rozgār likhte hue

jahāñ jahāñ tujhe sochā vahāñ vahāñ Thahrā

jo ahl-e-faiz the 'nāsir' vo rāh-rau nikle

ġhazal ke baab meñ tū mīr-e-kārvāñ Thahrā

jahan kahin dil-e-be-kal ka karwan Thahra

pae-nigar-e-shabistan-e-gul-ruKHan Thahra

KHirad shu'ur ki had se nikal ke nachti hai

junun tilism-gah-e-raqs-e-bismilan Thahra

shikast dil ko bahar-taur hath aaegi

jo faisla dil-o-dilbar ke darmiyan Thahra

tere firaq mein ho ya meri judai mein

mujhe aman na mili tu bhi be-aman Thahra

lahu lahu kiye jata hai meri miTTi ko

mere liye mera aansu wabaal-e-jaan Thahra

main dastan-e-gham-e-rozgar likhte hue

jahan jahan tujhe socha wahan wahan Thahra

jo ahl-e-faiz the 'nasir' wo rah-rau nikle

ghazal ke bab mein tu mir-e-karwan Thahra