chhupa kar falsafa bhi ek pas-e-tahrir rakkha hai

chhupā kar falsafa bhī ik pas-e-tahrīr rakkhā hai

kamān-e-fikr meñ jab bhī suḳhan kā tiir rakkhā hai

sabhī ḳhvāboñ kī tā'bīreñ to ulTī ho nahīñ saktīñ

to phir kyoñ zehn par ye ḳhatra-e-tā'bīr rakkhā hai

milī hai kāmyābī to hunar samjhā use ham ne

faqat nākāmiyoñ kā naam hī taqdīr rakkhā hai

vo likhte vaqt jis par aañkh se aañsū bhī Tapke the

tirā vo ḳhat abhī tak sūrat-e-tasvīr rakkhā hai

na ho mujh par yaqīñ to dekh le ḳhud hī kabhī aa kar

hifāzat se kaleje meñ tirā har tiir rakkhā hai

chhupa kar falsafa bhi ek pas-e-tahrir rakkha hai

kaman-e-fikr mein jab bhi suKHan ka tir rakkha hai

sabhi KHwabon ki ta'biren to ulTi ho nahin saktin

to phir kyon zehn par ye KHatra-e-ta'bir rakkha hai

mili hai kaamyabi to hunar samjha use hum ne

faqat nakaamiyon ka nam hi taqdir rakkha hai

wo likhte waqt jis par aankh se aansu bhi Tapke the

tera wo KHat abhi tak surat-e-taswir rakkha hai

na ho mujh par yaqin to dekh le KHud hi kabhi aa kar

hifazat se kaleje mein tera har tir rakkha hai