aazad ho chuke the gham-e-do-jahan se hum

āzād ho chuke the ġham-e-do-jahāñ se ham

dekho tumhārī yaad meñ lauTe kahāñ se ham

yaañ bhī asīr-e-shiddat-e-ehsās hī rahe

sehn-e-haram meñ aa.e the arz-e-butāñ se ham

har tez-rau ko shauq-e-qayādat hai āj-kal

kho.e gaye haiñ kashmakash-e-rahbarāñ se ham

taḳhrīb-e-gulsitāñ meñ barābar ke the sharīk

be-vaj.h bad-gumāñ hue daur-e-ḳhizāñ se ham

manzil milī to shauq-e-talab aur baḌh gayā

manzil pe aa ke duur hue kārvāñ se ham

thī ik matā'-e-hosh so ab vo bhī luT chukī

ab kyā hai jo savāl kareñ pāsbāñ se ham

ab intizār-e-mausam-e-gul bhī nahīñ 'fazā'

mānūs ho chuke haiñ yahāñ tak ḳhizāñ se ham

aazad ho chuke the gham-e-do-jahan se hum

dekho tumhaari yaad mein lauTe kahan se hum

yan bhi asir-e-shiddat-e-ehsas hi rahe

sehn-e-haram mein aae the arz-e-butan se hum

har tez-rau ko shauq-e-qayaadat hai aaj-kal

khoe gaye hain kashmakash-e-rahbaran se hum

taKHrib-e-gulsitan mein barabar ke the sharik

be-wajh bad-guman hue daur-e-KHizan se hum

manzil mili to shauq-e-talab aur baDh gaya

manzil pe aa ke dur hue karwan se hum

thi ek mata'-e-hosh so ab wo bhi luT chuki

ab kya hai jo sawal karen pasban se hum

ab intizar-e-mausam-e-gul bhi nahin 'faza'

manus ho chuke hain yahan tak KHizan se hum