tabhi to sochta hun KHush-nasib duniya hai

tabhī to sochtā huuñ ḳhush-nasīb duniyā hai

maiñ tujh se duur huuñ tere qarīb duniyā hai

na koī dar na darīcha na koī jugnū charāġh

hamārī soch se baḌh kar muhīb duniyā hai

base basā.e ko barbād kar ke chhoḌtī hai

ḳhayāl rakhnā ye duniyā 'ajīb duniyā hai

maiñ is liye bhī palaT aayā terī bastī se

tirī galī meñ dimāġhī ġharīb duniyā hai

kisī se baat karo to ye soch kar karnā

tumhārī soch se baḌh kar ḳhatīb duniyā hai

vo pul-sirāt kā honā bhī hai haqīqat par

yahāñ 'bilāl' ki misl-e-salīb duniyā hai

tabhi to sochta hun KHush-nasib duniya hai

main tujh se dur hun tere qarib duniya hai

na koi dar na daricha na koi jugnu charagh

hamari soch se baDh kar muhib duniya hai

base basae ko barbaad kar ke chhoDti hai

KHayal rakhna ye duniya 'ajib duniya hai

main is liye bhi palaT aaya teri basti se

teri gali mein dimaghi gharib duniya hai

kisi se baat karo to ye soch kar karna

tumhaari soch se baDh kar KHatib duniya hai

wo pul-siraat ka hona bhi hai haqiqat par

yahan 'bilal' ki misl-e-salib duniya hai