baaton baaton mein duniya par dhyan hamara ja sakta hai

bātoñ bātoñ meñ duniyā par dhyān hamārā jā saktā hai

yā'nī tere pahlū meñ bhī hijr guzārā jā saktā hai

ḳhushbū meñ ras ghol rahā huuñ rangoñ aur āvāzoñ kā

is ehsās ko chhū kar logo ḳhvāb sañvārā jā saktā hai

dekh rahā huuñ biite manzar ek samay kī khiḌkī se

yuuñ lagtā hai un lamhoñ ko aaj pukārā jā saktā hai

jabr-o-qadr kā sāhil hai ye langar bas tayyār rahe

thoḌī sī tāḳhīr huī to duur kināra jā saktā hai

dil mausam afsurda ho jab ḳhāmoshī hī behtar hai

baat karo to māyūsī kī samt ishāra jā saktā hai

laakh uThāne par bhī ham se dil kā bojh nahīñ uTh paatā

ham samjhe the har mushkil ko aap sahārā jā saktā hai

zarra zarra dekh hī leñge bhed bharī duniyāoñ kā ham

sayyāre kī aañkh se ab to 'aks utārā jā saktā hai

baaton baaton mein duniya par dhyan hamara ja sakta hai

ya'ni tere pahlu mein bhi hijr guzara ja sakta hai

KHushbu mein ras ghol raha hun rangon aur aawazon ka

is ehsas ko chhu kar logo KHwab sanwara ja sakta hai

dekh raha hun bite manzar ek samay ki khiDki se

yun lagta hai un lamhon ko aaj pukara ja sakta hai

jabr-o-qadr ka sahil hai ye langar bas tayyar rahe

thoDi si taKHir hui to dur kinara ja sakta hai

dil mausam afsurda ho jab KHamoshi hi behtar hai

baat karo to mayusi ki samt ishaara ja sakta hai

lakh uThane par bhi hum se dil ka bojh nahin uTh pata

hum samjhe the har mushkil ko aap sahaara ja sakta hai

zarra zarra dekh hi lenge bhed bhari duniyaon ka hum

sayyare ki aankh se ab to 'aks utara ja sakta hai