aaKHirash chhoD ke jaani hai ye sari duniya

āḳhirash chhoḌ ke jaanī hai ye saarī duniyā

phir bhī har shaḳhs ne shiddat se sañvārī duniyā

ye alag baat yahāñ kaun rukegā kitnā

mustaqil hai na hamārī na tumhārī duniyā

haa.e aulād kī jānib se tavajjoh kī kamī

būḌhe maañ baap ko lagne lagī bhārī duniyā

mujh ko mā'lūm hai duniyā kī haqīqat kyā hai

jis ko lagtī hai so lagtī rahe pyārī duniyā

rafta rafta ye hameñ kāTtī jaatī hai janāb

yā'nī ham log shajar aur hai aarī duniyā

kaisī duniyā hai ki us ko bhī nahīñ chhoḌtī hai

jis ne pal bhar kabhī sar se na utārī duniyā

bā'd-az-maut ḳhudā hashr meñ pūchhegā zarūr

aao batlāo zarā kaise guzārī duniyā

ham bhī chal deñge ise chhoḌ ke ik din 'kāshif'

rotī rah jā.egī pīchhe ye bichārī duniyā

aaKHirash chhoD ke jaani hai ye sari duniya

phir bhi har shaKHs ne shiddat se sanwari duniya

ye alag baat yahan kaun rukega kitna

mustaqil hai na hamari na tumhaari duniya

hae aulad ki jaanib se tawajjoh ki kami

buDhe man bap ko lagne lagi bhaari duniya

mujh ko ma'lum hai duniya ki haqiqat kya hai

jis ko lagti hai so lagti rahe pyari duniya

rafta rafta ye hamein kaTti jati hai janab

ya'ni hum log shajar aur hai aari duniya

kaisi duniya hai ki us ko bhi nahin chhoDti hai

jis ne pal bhar kabhi sar se na utari duniya

ba'd-az-maut KHuda hashr mein puchhega zarur

aao batlao zara kaise guzari duniya

hum bhi chal denge ise chhoD ke ek din 'kashif'

roti rah jaegi pichhe ye bichaari duniya