KHwab mein jitna KHala dekhte hain

ḳhvāb meñ jitnā ḳhalā dekhte haiñ

dil ko mā'lūm hai kyā dekhte haiñ

is tajassus kā koī hal hī nahīñ

terī sūrat meñ ḳhudā dekhte haiñ

dekhte haiñ vo mirī āñkhoñ meñ

kahte haiñ aap nayā dekhte haiñ

ab jalā rakh ki bujhā rakh ye diyā

ham to bas raqs-e-havā dekhte haiñ

dekhte sab ko barābar haiñ magar

tujh ko ham sab se judā dekhte haiñ

jab zarūrat ho use raushnī kī

ḳhud ko ham log jalā dekhte haiñ

dil ko miltā hai sukūñ tab 'aḳhtar'

maañ ko jab mahv-e-du'ā dekhte haiñ

KHwab mein jitna KHala dekhte hain

dil ko ma'lum hai kya dekhte hain

is tajassus ka koi hal hi nahin

teri surat mein KHuda dekhte hain

dekhte hain wo meri aankhon mein

kahte hain aap naya dekhte hain

ab jala rakh ki bujha rakh ye diya

hum to bas raqs-e-hawa dekhte hain

dekhte sab ko barabar hain magar

tujh ko hum sab se juda dekhte hain

jab zarurat ho use raushni ki

KHud ko hum log jala dekhte hain

dil ko milta hai sukun tab 'aKHtar'

man ko jab mahw-e-du'a dekhte hain