hadse KHushiyon mein badal jaen

hādse ḳhushiyoñ meñ badal jaa.eñ

tere sar se balā.eñ Tal jaa.eñ

aise rone se kuchh nahīñ hogā

muskurāo ki log jal jaa.eñ

sā.īñ aisā koī vazīfa batā

vo mire zehn se nikal jaa.eñ

aise logoñ pe rahm ho jin ke

kam-sinī meñ hī baḳht Dhal jaa.eñ

un se milnā nasīb hove aur

ham ḳhushī se gazoñ uchhal jaa.eñ

dekh to jald lauT aa varna

ye na ho yaar ham sañbhal jaa.eñ

tum kisī roz milne aaoge

ham isī aas meñ bahal jaa.eñ

merī chaukhaT pe aa.e shahzādī

aur ham 'shāh' ke mahal jaa.eñ

hadse KHushiyon mein badal jaen

tere sar se balaen Tal jaen

aise rone se kuchh nahin hoga

muskurao ki log jal jaen

sain aisa koi wazifa bata

wo mere zehn se nikal jaen

aise logon pe rahm ho jin ke

kam-sini mein hi baKHt Dhal jaen

un se milna nasib howe aur

hum KHushi se gazon uchhal jaen

dekh to jald lauT aa warna

ye na ho yar hum sanbhal jaen

tum kisi roz milne aaoge

hum isi aas mein bahal jaen

meri chaukhaT pe aae shahzadi

aur hum 'shah' ke mahal jaen