ghuT gaya dam kholiye khiDki hawa le lijiye

ghuT gayā dam kholiye khiḌkī havā le lījiye

muntazir kuchh log haiñ un kī du'ā le lījiye

keh rahī hai us ke hoñToñ par tabassum kī lakīr

ḳhuuñ huā hai dil to us kā ḳhūñ-bahā le lījiye

sab ko dil kī baat samjhāne se āḳhir fā.ida

apne sar par saarī duniyā kā gila le lījiye

dekhne us ko chale jis kā nishāñ koī nahīñ

sab se pahle aap apnā to patā le lījiye

do qadam chalnā agar dūbhar huā hai aap ko

aasrā girtī huī dīvār kā le lījiye

jāgtī āñkheñ sulagtā dil ki tanhā.ī ke rang

hai safar dar-pesh apne saath kyā le lījiye

dā.imī kar dījiye jaatī huī fasl-e-bahār

aañkh kī putlī meñ tasvīr-e-sabā le lījiye

rāsta tārīk hai dar-pesh hai shab kā safar

apne sar par din ke sūraj kī ridā le lījiye

bas yahī hogā ki dīvāna kaheñge ahl-e-bazm

aap chup kyuuñ haiñ mirī tarz-e-navā le lījiye

is tarah shahzād kaise kaT sakegī zindagī

ek ġham apnī bhī tāqat se sivā le lījiye

ghuT gaya dam kholiye khiDki hawa le lijiye

muntazir kuchh log hain un ki du'a le lijiye

keh rahi hai us ke honTon par tabassum ki lakir

KHun hua hai dil to us ka KHun-baha le lijiye

sab ko dil ki baat samjhane se aaKHir faida

apne sar par sari duniya ka gila le lijiye

dekhne us ko chale jis ka nishan koi nahin

sab se pahle aap apna to pata le lijiye

do qadam chalna agar dubhar hua hai aap ko

aasra girti hui diwar ka le lijiye

jagti aankhen sulagta dil ki tanhai ke rang

hai safar dar-pesh apne sath kya le lijiye

daimi kar dijiye jati hui fasl-e-bahaar

aankh ki putli mein taswir-e-saba le lijiye

rasta tarik hai dar-pesh hai shab ka safar

apne sar par din ke suraj ki rida le lijiye

bas yahi hoga ki diwana kahenge ahl-e-bazm

aap chup kyun hain meri tarz-e-nawa le lijiye

is tarah shahzad kaise kaT sakegi zindagi

ek gham apni bhi taqat se siwa le lijiye