bhar do jahan mein apni wafaon ki aab-o-tab

bhar do jahāñ meñ apnī vafāoñ kī āb-o-tāb

miT jaa.e tā-ki naqlī ḳhudāoñ kī āb-o-tāb

dil ko agar banā leñ mohabbat kā aa.ina

miT jā.egī jahāñ se jafāoñ kī āb-o-tāb

ham log bhuul jaa.eñ agar apne iḳhtilāf

hogī jahāñ se ḳhatm balāoñ kī āb-o-tāb

rakhnā hai gar ravāñ-davāñ insān kā dimāġh

qaa.em rahe hamesha sadāoñ kī āb-o-tāb

ye hai tabīb-e-vaqt kā is daur meñ kamāl

hai sūd-mand aaj davāoñ kī āb-o-tāb

tābinda ye rahī hai rahegī tamām 'umr

mā'dūm kab rahī hai du'āoñ kī āb-o-tāb

ab fard-e-sāda-lauh kā jiinā muhāl hai

'ātish' 'urūj par hai adāoñ kī āb-o-tāb

bhar do jahan mein apni wafaon ki aab-o-tab

miT jae ta-ki naqli KHudaon ki aab-o-tab

dil ko agar bana len mohabbat ka aaina

miT jaegi jahan se jafaon ki aab-o-tab

hum log bhul jaen agar apne iKHtilaf

hogi jahan se KHatm balaon ki aab-o-tab

rakhna hai gar rawan-dawan insan ka dimagh

qaem rahe hamesha sadaon ki aab-o-tab

ye hai tabib-e-waqt ka is daur mein kamal

hai sud-mand aaj dawaon ki aab-o-tab

tabinda ye rahi hai rahegi tamam 'umr

ma'dum kab rahi hai du'aon ki aab-o-tab

ab fard-e-sada-lauh ka jina muhaal hai

'atish' 'uruj par hai adaon ki aab-o-tab