bhaTke huon ko rah dikhata hun mere dost

bhaTke huoñ ko raah dikhātā huuñ mere dost

maiñ kārobār-e-dasht chalātā huuñ mere dost

lafzoñ se kheltā huuñ ḳhayāloñ kī bhiiḌ meñ

shā'ir huuñ aur she'r sunātā huuñ mere dost

apnī ḳhushī se zahr to piitā nahīñ koī

majbūr huuñ so tujh se nibhātā huuñ mere dost

koī bhī shaḳhs baat mirī māntā nahīñ

jis ko bhī tere baare batātā huuñ mere dost

vo din kahāñ ki us se mulāqāt ho mirī

tasvīr hī se kaam chalātā huuñ mere dost

har roz ek baat khaTaktī hai zehn meñ

har roz ek baat bhulātā huuñ mere dost

dukh ye hai saal saal meñ aatā hai ek ḳhvāb

aur jāgte hī bhuul bhī jaatā huuñ mere dost

rozāna koī vaqt kā kartā hai ehtirām

rozāna maiñ hī der se aatā huuñ mere dost

bhaTke huon ko rah dikhata hun mere dost

main karobar-e-dasht chalata hun mere dost

lafzon se khelta hun KHayalon ki bhiD mein

sha'ir hun aur she'r sunata hun mere dost

apni KHushi se zahr to pita nahin koi

majbur hun so tujh se nibhata hun mere dost

koi bhi shaKHs baat meri manta nahin

jis ko bhi tere bare batata hun mere dost

wo din kahan ki us se mulaqat ho meri

taswir hi se kaam chalata hun mere dost

har roz ek baat khaTakti hai zehn mein

har roz ek baat bhulata hun mere dost

dukh ye hai sal sal mein aata hai ek KHwab

aur jagte hi bhul bhi jata hun mere dost

rozana koi waqt ka karta hai ehtiram

rozana main hi der se aata hun mere dost