rakh-rakhaw mein koi KHwar nahin hota yar

rakh-rakhāv meñ koī ḳhvār nahīñ hotā yaar

dost hote haiñ, har ik yaar nahīñ hotā yaar

do ghaḌī baiTho mire paas, kaho kaisī ho

do ghaḌī baiThne se pyaar nahīñ hotā yaar

yaar! ye hijr kā ġham! is se to maut achchhī hai

jaañ se yuuñ hī koī bezār nahīñ hotā yaar

ruuh suntī hai mohabbat meñ badan bolte haiñ

lafz pairāya-e-iz.hār nahīñ hotā yaar

naukrī, shā.irī, ghar-bār, zamāna, qadreñ

ik mohabbat hī kā āzār nahīñ hotā yaar

ḳhush-dilī aur hai aur ishq kā āzār kuchh aur

pyaar ho jaa.e to iqrār nahīñ hotā yaar

laḌkiyāñ lafz kī tasvīr chhupā letī haiñ

un kā iz.hār bhī iz.hār nahīñ hotā yaar

aadmī ishq meñ bhī ḳhud se nahīñ ghaT saktā

aadmī sāya-e-dīvār nahīñ hotā yār!!

gher letī hai koī zulf, koī bū-e-badan

jaan kar koī giraftār nahīñ hotā yaar

yahī ham aap haiñ hastī kī kahānī, is meñ

koī afsānvī kirdār nahīñ hotā yaar

rakh-rakhaw mein koi KHwar nahin hota yar

dost hote hain, har ek yar nahin hota yar

do ghaDi baiTho mere pas, kaho kaisi ho

do ghaDi baiThne se pyar nahin hota yar

yar! ye hijr ka gham! is se to maut achchhi hai

jaan se yun hi koi bezar nahin hota yar

ruh sunti hai mohabbat mein badan bolte hain

lafz pairaya-e-izhaar nahin hota yar

naukri, shairi, ghar-bar, zamana, qadren

ek mohabbat hi ka aazar nahin hota yar

KHush-dili aur hai aur ishq ka aazar kuchh aur

pyar ho jae to iqrar nahin hota yar

laDkiyan lafz ki taswir chhupa leti hain

un ka izhaar bhi izhaar nahin hota yar

aadmi ishq mein bhi KHud se nahin ghaT sakta

aadmi saya-e-diwar nahin hota yar!!

gher leti hai koi zulf, koi bu-e-badan

jaan kar koi giraftar nahin hota yar

yahi hum aap hain hasti ki kahani, is mein

koi afsanwi kirdar nahin hota yar