do-chaar sitare hi meri aankh mein dhar ja

do-chār sitāre hī mirī aañkh meñ dhar jā

kuchh der to ai sā.at-e-shab mujh meñ Thahar jā

ab aur sambhālī nahīñ jaatī tirī hurmat

yuuñ kar ġham-e-jānāñ merī nazroñ se utar jā

tā-'umr tirā naqsh-e-farozāñ rahe mujh meñ

ik zaḳhm kī sūrat mire māthe pe ubhar jā

chhoḌ aanā vahīñ par zarā āvāra-mizājī

sahrā kī taraf ai dil-e-nādān agar jā

yā ho jā tū dariyā kī nigāhoñ meñ tarāzū

yā tishna-labī saath liye jaañ se guzar jā

jab zehn ko sunñī hī nahīñ baat tumhārī

dil tū bhī rusūmāt-e-tafāhum se mukar jā

do-chaar sitare hi meri aankh mein dhar ja

kuchh der to ai saat-e-shab mujh mein Thahar ja

ab aur sambhaali nahin jati teri hurmat

yun kar gham-e-jaanan meri nazron se utar ja

ta-'umr tera naqsh-e-farozan rahe mujh mein

ek zaKHm ki surat mere mathe pe ubhar ja

chhoD aana wahin par zara aawara-mizaji

sahra ki taraf ai dil-e-nadan agar ja

ya ho ja tu dariya ki nigahon mein taraazu

ya tishna-labi sath liye jaan se guzar ja

jab zehn ko sunni hi nahin baat tumhaari

dil tu bhi rusumat-e-tafahum se mukar ja