koi samjhae ye kya rang hai mai-KHane ka

koī samjhā.e ye kyā rang hai mai-ḳhāne kā

aañkh saaqī kī uThe naam ho paimāne kā

kis ko mā'lūm thī pahle se ḳhirad kī qīmat

'ālam-e-hosh pe ehsān hai dīvāne kā

garmī-e-sham’ kā afsāna sunāne vaalo

raqs dekhā nahīñ tum ne abhī parvāne kā

kam-nigāhī se mirī samt sar-e-bazm na dekh

silsila TuuT na jaa.e kahīñ afsāne kā

chashm-e-sāqī mujhe har gaam pe yaad aatī hai

rāsta bhuul na jā.ūñ kahīñ mai-ḳhāne kā

ab to har shaam guzartī hai usī kūche meñ

ye natīja huā nāseh tire samjhāne kā

yuuñ hī ābādiyāñ phailīñ to kisī din shāyad

rāsta hī na rahe shahr se vīrāne kā

manzil-e-ġham se guzarnā to hai āsāñ 'iqbāl'

'ishq hai naam ḳhud apne se guzar jaane kā

koi samjhae ye kya rang hai mai-KHane ka

aankh saqi ki uThe nam ho paimane ka

kis ko ma'lum thi pahle se KHirad ki qimat

'alam-e-hosh pe ehsan hai diwane ka

garmi-e-sham’ ka afsana sunane walo

raqs dekha nahin tum ne abhi parwane ka

kam-nigahi se meri samt sar-e-bazm na dekh

silsila TuT na jae kahin afsane ka

chashm-e-saqi mujhe har gam pe yaad aati hai

rasta bhul na jaun kahin mai-KHane ka

ab to har sham guzarti hai usi kuche mein

ye natija hua naseh tere samjhane ka

yun hi aabaadiyan phailin to kisi din shayad

rasta hi na rahe shahr se virane ka

manzil-e-gham se guzarna to hai aasan 'iqbaal'

'ishq hai nam KHud apne se guzar jaane ka