din ko daftar mein akela shab bhare ghar mein akela

din ko daftar meñ akelā shab bhare ghar meñ akelā

maiñ ki aks-e-muntashir ek ek manzar meñ akelā

uḌ chalā vo ik judā ḳhāka liye sar meñ akelā

sub.h kā pahlā parinda āsmāñ bhar meñ akelā

kaun de āvāz ḳhālī raat ke andhe kueñ meñ

kaun utre ḳhvāb se mahrūm bistar meñ akelā

us ko tanhā kar ga.ī karvaT koī pichhle pahar kī

phir uḌā bhāgā vo saarā din nagar bhar meñ akelā

ek maddham aañch sī āvāz sargam se alag kuchh

rañg ik dabtā huā sā puure manzar meñ akelā

boltī tasvīr meñ ik naqsh lekin kuchh haTā sā

ek harf-e-mo'tabar lafzoñ ke lashkar meñ akelā

jaao maujo merī manzil kā pata kyā pūchhtī ho

ik jazīra duur uftāda samundar meñ akelā

jaane kis ehsās ne aage nahīñ baḌhne diyā thā

ab paḌā huuñ qaid maiñ raste ke patthar meñ akelā

hū-ba-hū merī tarah chup-chāp mujh ko dekhtā hai

ik laraztā ḳhūb-sūrat aks sāġhar meñ akelā

din ko daftar mein akela shab bhare ghar mein akela

main ki aks-e-muntashir ek ek manzar mein akela

uD chala wo ek juda KHaka liye sar mein akela

subh ka pahla parinda aasman bhar mein akela

kaun de aawaz KHali raat ke andhe kuen mein

kaun utre KHwab se mahrum bistar mein akela

us ko tanha kar gai karwaT koi pichhle pahar ki

phir uDa bhaga wo sara din nagar bhar mein akela

ek maddham aanch si aawaz sargam se alag kuchh

rang ek dabta hua sa pure manzar mein akela

bolti taswir mein ek naqsh lekin kuchh haTa sa

ek harf-e-mo'tabar lafzon ke lashkar mein akela

jao maujo meri manzil ka pata kya puchhti ho

ek jazira dur uftada samundar mein akela

jaane kis ehsas ne aage nahin baDhne diya tha

ab paDa hun qaid main raste ke patthar mein akela

hu-ba-hu meri tarah chup-chap mujh ko dekhta hai

ek larazta KHub-surat aks saghar mein akela