masarrat mere chehre se ayan hai

masarrat mere chehre se 'ayāñ hai

magar vo ġham jo siine meñ nihāñ hai

mohabbat jis ke dil par hukmrāñ hai

vahī insān us kā rāz-dāñ hai

haqīqat meñ vahī vahm-o-gumāñ hai

jo insāñ kī nigāhoñ se nihāñ hai

bachā hai jo bhī is kī nazr kar do

vo rahzan thā ye mīr-e-kārvāñ hai

jafāoñ par kisī kī tabsira kyuuñ

ki ye rāz-e-hisāb-e-dostāñ hai

ḳhudā us maslahat se duur rakkhe

jo shaiḳh-o-barhaman ke darmiyāñ hai

luġhat kī ye nahīñ muhtāj 'rāhī'

mohabbat kī zabāñ dil kī zabāñ hai

masarrat mere chehre se 'ayan hai

magar wo gham jo sine mein nihan hai

mohabbat jis ke dil par hukmran hai

wahi insan us ka raaz-dan hai

haqiqat mein wahi wahm-o-guman hai

jo insan ki nigahon se nihan hai

bacha hai jo bhi is ki nazr kar do

wo rahzan tha ye mir-e-karwan hai

jafaon par kisi ki tabsira kyun

ki ye raaz-e-hisab-e-dostan hai

KHuda us maslahat se dur rakkhe

jo shaiKH-o-barhaman ke darmiyan hai

lughat ki ye nahin muhtaj 'rahi'

mohabbat ki zaban dil ki zaban hai