dil se husul-e-zar ke sabhi zoam haT gae

dil se husūl-e-zar ke sabhī zo.am haT ga.e

fikr-e-ma.āsh baḌh ga.ī ḳhānoñ meñ baT ga.e

phir yuuñ huā ki mujh se vo yūñhī bichhaḌ gayā

phir yuuñ huā ki ziist ke din yūñhī kaT ga.e

khenā sakhī sakhī na sajan kī taraf mujhe

lenā sakhī sakhī mire paañv rapaT ga.e

ā.īna us ko dekh ke mab.hūt ho gayā

gul-dān meñ gulāb lajā kar simaT ga.e

aḳhroT khā.eñ tāpeñ añgeThī pe aag aa

raste tamām gaañv ke kohre se aT ga.e

aane diyā na mere buzurgoñ ne haq pe harf

maidān karbalāoñ ke lāshoñ se paT ga.e

Daalī nadī meñ naav na bargad ke nīche peñg

tū kyā gayā palaT ke vo sab din palaT ga.e

khādeñ lagīñ to chhoḌ ga.iiñ khet titliyāñ

fasleñ baḌhīñ to Daar parindoñ ke ghaT ga.e

us se milī nazar to larazne lagā badan

diide sakhī rī dekh ke pirītam ko phaT ga.e

tū shānt ho ki terī murādeñ huiiñ saphal

bādal garaj-baraj ke jo aa.e the chhaT ga.e

dekhā to us ke tan pe gire kevḌe ke phuul

paañv se ābshār ke paanī lipaT ga.e

dil se husul-e-zar ke sabhi zoam haT gae

fikr-e-maash baDh gai KHanon mein baT gae

phir yun hua ki mujh se wo yunhi bichhaD gaya

phir yun hua ki zist ke din yunhi kaT gae

khena sakhi sakhi na sajan ki taraf mujhe

lena sakhi sakhi mere panw rapaT gae

aaina us ko dekh ke mabhut ho gaya

gul-dan mein gulab laja kar simaT gae

aKHroT khaen tapen angeThi pe aag aa

raste tamam ganw ke kohre se aT gae

aane diya na mere buzurgon ne haq pe harf

maidan karbalaon ke lashon se paT gae

Dali nadi mein naw na bargad ke niche peng

tu kya gaya palaT ke wo sab din palaT gae

khaden lagin to chhoD gain khet titliyan

faslen baDhin to Dar parindon ke ghaT gae

us se mili nazar to larazne laga badan

dide sakhi ri dekh ke piritam ko phaT gae

tu shant ho ki teri muraden huin saphal

baadal garaj-baraj ke jo aae the chhaT gae

dekha to us ke tan pe gire kewDe ke phul

panw se aabshaar ke pani lipaT gae