dil mat Tapak nazar se ki paya na jaega

dil mat Tapak nazar se ki paayā na jā.egā

juuñ ashk phir zamīñ se uThāyā na jā.egā

ruḳhsat hai bāġhbāñ ki tanik dekh leñ chaman

jaate haiñ vaañ jahāñ se phir aayā na jā.egā

aane se fauj-e-ḳhat ke na ho dil ko muḳhlisī

bañdhuā hai zulf kā ye chhuTāyā na jā.egā

pahuñcheñge us chaman meñ na ham daad ko kabhū

juuñ gul ye chāk-e-jeb silāyā na jā.egā

teġh-e-jafā-e-yār se dil sar na pheriyo

phir muñh vafā ko ham se dikhāyā na jā.egā

āvegā vo chaman meñ na ai abr jab talak

paanī guloñ ke muñh meñ chuvāyā na jā.egā

ammāme ko utaar ke paḌhiyo namāz shaiḳh

sajde se varna sar ko uThāyā na jā.egā

zāhid gile se mastoñ ke baaz aane kā nahīñ

tā mai-kade meñ lā ke chhakāyā na jā.egā

zālim na maiñ kahā thā ki is ḳhuuñ se darguzar

'saudā' kā qatl hai ye chhupāyā na jā.egā

dāmān-o-dāġh-e-teġh ko dhoyā to kyā huā

aalam ke dil se daaġh dhulāyā na jā.egā

dil mat Tapak nazar se ki paya na jaega

jun ashk phir zamin se uThaya na jaega

ruKHsat hai baghban ki tanik dekh len chaman

jate hain wan jahan se phir aaya na jaega

aane se fauj-e-KHat ke na ho dil ko muKHlisi

bandhua hai zulf ka ye chhuTaya na jaega

pahunchenge us chaman mein na hum dad ko kabhu

jun gul ye chaak-e-jeb silaya na jaega

tegh-e-jafa-e-yar se dil sar na pheriyo

phir munh wafa ko hum se dikhaya na jaega

aawega wo chaman mein na ai abr jab talak

pani gulon ke munh mein chuwaya na jaega

ammame ko utar ke paDhiyo namaz shaiKH

sajde se warna sar ko uThaya na jaega

zahid gile se maston ke baz aane ka nahin

ta mai-kade mein la ke chhakaya na jaega

zalim na main kaha tha ki is KHun se darguzar

'sauda' ka qatl hai ye chhupaya na jaega

daman-o-dagh-e-tegh ko dhoya to kya hua

aalam ke dil se dagh dhulaya na jaega