dil DhunDhti hai nigah kisi ki

dil DhūñDhtī hai nigah kisī kī

ā.īne kī hai na aarsī kī

mālik mire maiñ ne mai-kashī kī

lekin ye ḳhatā kabhī kabhī kī

kyā shakl hai vasl meñ kisī kī

tasvīr haiñ apnī bebasī kī

khul jaa.e sabā kī pāk-bāzī

bū phūTe jo baaġh meñ kalī kī

kam-baḳht kabhī na ḳhush huā tū

ai ġham tirī har tarah ḳhushī kī

muñh ham ne hañsī hañsī meñ chūmā

jo ho ga.ī baat thī hañsī kī

taanā sā tanā hai mai-kade meñ

pagḌī uchhlī hai shaiḳh-jī kī

ham ko jo diyā to aur kā dil

dil le ke ye achchhī dil-lagī kī

yuuñ bhī to chalā na kaam apnā

dushman se bhī ham ne dostī kī

paa.e ga.e jis meñ dil ke ajzā

hogī vo ḳhaak usī galī kī

aisī hai ki pī sakegā vaa.iz

hai taaza kashīd aaj hī kī

mai ḳhuld meñ hogī sūrat-e-hūr

maiḳhāne meñ shakl hai parī kī

ghar hai na kahīñ nishāñ lahad kā

miTTī hai ḳharāb be-kasī kī

sach ye hai ki zindagī ho yā maut

har chiiz burī hai muflisī kī

achchhī hai gazak se, talḳh mai se

miltī rahe roz rūkhī-phīkī

kuchh kuchh hai 'riyāz' 'mīr' kā rañg

kuchh shaan hai ham meñ 'mus.hafī' kī

dil DhunDhti hai nigah kisi ki

aaine ki hai na aarsi ki

malik mere main ne mai-kashi ki

lekin ye KHata kabhi kabhi ki

kya shakl hai wasl mein kisi ki

taswir hain apni bebasi ki

khul jae saba ki pak-bazi

bu phuTe jo bagh mein kali ki

kam-baKHt kabhi na KHush hua tu

ai gham teri har tarah KHushi ki

munh hum ne hansi hansi mein chuma

jo ho gai baat thi hansi ki

tana sa tana hai mai-kade mein

pagDi uchhli hai shaiKH-ji ki

hum ko jo diya to aur ka dil

dil le ke ye achchhi dil-lagi ki

yun bhi to chala na kaam apna

dushman se bhi hum ne dosti ki

pae gae jis mein dil ke ajza

hogi wo KHak usi gali ki

aisi hai ki pi sakega waiz

hai taza kashid aaj hi ki

mai KHuld mein hogi surat-e-hur

maiKHane mein shakl hai pari ki

ghar hai na kahin nishan lahad ka

miTTi hai KHarab be-kasi ki

sach ye hai ki zindagi ho ya maut

har chiz buri hai muflisi ki

achchhi hai gazak se, talKH mai se

milti rahe roz rukhi-phiki

kuchh kuchh hai 'riyaz' 'mir' ka rang

kuchh shan hai hum mein 'mushafi' ki