mera dil-e-agah hai ek ganj-e-maani

merā dil-e-āgāh hai ik ganj-e-ma'ānī

ai ham-suḳhano tum ne mirī qadr na jaanī

terī har adā husn se tere jo sivā hai

sūrat ko tirī saaf banā detī hai mā'nī

ik lamha bhī is ziist kā vaqfa hai abad kā

ik vahm hai ye tafraqa-e-bāqī-o-fānī

ruḳhsār haiñ vo sub.h-e-banāras kī ziyā.eñ

zulfoñ meñ tirī shām-e-avadh kī hai javānī

aise meñ ho taufīq-e-samā'at mujhe ai kaash

jab raat sunātī ho tire ġham kī kahānī

mahbūb kā dīdār to mauqa' hai ḳhushī kā

ai dīda-e-tar tū ne mirī ek na maanī

'ālam mirī āvāz meñ hai qaus-e-quzah kā

mausīqī-e-alfāz hai yā raqs-e-ma'ānī

qāmat kī bulandī hai ki hai kufr kī me'rāj

ye chashm-e-siyah hai ki gunāhoñ kī javānī

har din hai tirī tābish-e-ruḳhsār kā partav

ḳhushbū tirī har raat hai ai raat kī raanī

jitnā hī dabe utnā hī ubhre tan-e-rā'nā

har 'uzv meñ rakh dī hai koī zinda kamānī

paimān-e-mohabbat bhī ik andāz-e-taġhāful

un āñkhoñ se ab kaun kare yād-dahānī

maḳhdūm-e-jahāñ hai tū shah-e-kaj-kulahāñ hai

aage tire kyā chiiz hai aurang-e-kiyānī

qāmat hai ki saf-basta chhalakte hue sāġhar

sūrat hai ki dariyā-e-mohabbat kī ravānī

mujh soḳhta-sāmāñ pe na bhūle se nazar kar

mar jaa.e na ai dost tirī āñkhoñ kā paanī

is ruup kā maskan na ellora na ajantā

fan-kār-e-ḳhat-e-jism na bahzād na maanī

be-jān tū phir ai dil-e-māyūs-e-jahāñ hai

ye ai mirī jaañ tū ne bhī kyā jī meñ hai Thānī

parchhā.īñ usī kī ye zamāñ aur makāñ haiñ

hastī-e-mohabbat na makānī na zamānī

kis mulk se bheje hue aate haiñ barābar

har barg-e-gul-e-tāza se paiġhām-e-zabānī

bedār shab-e-hijr sitāre bhī haiñ maiñ bhī

ye raat kī hai raat kahānī kī kahānī

ye sharh-e-haqā.eq ye pareshān-ḳhayālī

ye nukta-rasī aur ye āshufta-bayānī

ai ham-suḳhano fan kī amānat ye qalam hai

hai is kī zabāñ vaqf-e-pa.e-sehr-bayānī

andāz-e-'firāq' aur hī andāz hai yaaro

vo 'mīr' kā ham-sheva na vo ġhālib-e-sānī

mera dil-e-agah hai ek ganj-e-ma'ani

ai ham-suKHano tum ne meri qadr na jaani

teri har ada husn se tere jo siwa hai

surat ko teri saf bana deti hai ma'ni

ek lamha bhi is zist ka waqfa hai abad ka

ek wahm hai ye tafraqa-e-baqi-o-fani

ruKHsar hain wo subh-e-banaras ki ziyaen

zulfon mein teri sham-e-awadh ki hai jawani

aise mein ho taufiq-e-sama'at mujhe ai kash

jab raat sunati ho tere gham ki kahani

mahbub ka didar to mauqa' hai KHushi ka

ai dida-e-tar tu ne meri ek na mani

'alam meri aawaz mein hai qaus-e-quzah ka

mausiqi-e-alfaz hai ya raqs-e-ma'ani

qamat ki bulandi hai ki hai kufr ki me'raj

ye chashm-e-siyah hai ki gunahon ki jawani

har din hai teri tabish-e-ruKHsar ka partaw

KHushbu teri har raat hai ai raat ki rani

jitna hi dabe utna hi ubhre tan-e-ra'na

har 'uzw mein rakh di hai koi zinda kamani

paiman-e-mohabbat bhi ek andaz-e-taghaful

un aankhon se ab kaun kare yaad-dahani

maKHdum-e-jahan hai tu shah-e-kaj-kulahan hai

aage tere kya chiz hai aurang-e-kiyani

qamat hai ki saf-basta chhalakte hue saghar

surat hai ki dariya-e-mohabbat ki rawani

mujh soKHta-saman pe na bhule se nazar kar

mar jae na ai dost teri aankhon ka pani

is rup ka maskan na ellora na ajanta

fan-kar-e-KHat-e-jism na bahzad na mani

be-jaan tu phir ai dil-e-mayus-e-jahan hai

ye ai meri jaan tu ne bhi kya ji mein hai Thani

parchhain usi ki ye zaman aur makan hain

hasti-e-mohabbat na makani na zamani

kis mulk se bheje hue aate hain barabar

har barg-e-gul-e-taza se paigham-e-zabani

bedar shab-e-hijr sitare bhi hain main bhi

ye raat ki hai raat kahani ki kahani

ye sharh-e-haqaeq ye pareshan-KHayali

ye nukta-rasi aur ye aashufta-bayani

ai ham-suKHano fan ki amanat ye qalam hai

hai is ki zaban waqf-e-pae-sehr-bayani

andaz-e-'firaq' aur hi andaz hai yaro

wo 'mir' ka ham-shewa na wo ghaalib-e-sani