dushman ko dost dost ko dushman bana liya

dushman ko dost dost ko dushman banā liyā

yuuñ bazm-e-rasm-o-rāh ko phir se sajā liyā

āñkheñ mirī tarastī rahīñ us kī diid ko

bādal ne mere chāñd ko aise chhupā liyā

jugnū se raushnī kī tavaqqo' na maiñ ne kī

bujhne lagā charāġh to dil ko jalā liyā

sahrā meñ taptī ret pe chalte chale gaye

chal chal ke ham ne 'ishq kī manzil ko pā liyā

ḳhūn-e-jigar se dard ke sho'le bhaḌak gaye

jalne lagā vujūd to aañsū bahā liyā

jis ne tamām 'umr faqat zaḳhm hī diye

maiñ ne usī kī yaad ko marham banā liyā

baḌhne lagī jo kaifiyat-e-iztirāb-e-‘ishq

'aḳhtar' kisī ġhazal ko tirī gungunā liyā

dushman ko dost dost ko dushman bana liya

yun bazm-e-rasm-o-rah ko phir se saja liya

aankhen meri tarasti rahin us ki did ko

baadal ne mere chand ko aise chhupa liya

jugnu se raushni ki tawaqqo' na main ne ki

bujhne laga charagh to dil ko jala liya

sahra mein tapti ret pe chalte chale gaye

chal chal ke hum ne 'ishq ki manzil ko pa liya

KHun-e-jigar se dard ke sho'le bhaDak gaye

jalne laga wujud to aansu baha liya

jis ne tamam 'umr faqat zaKHm hi diye

main ne usi ki yaad ko marham bana liya

baDhne lagi jo kaifiyat-e-iztirab-e-‘ishq

'aKHtar' kisi ghazal ko teri gunguna liya