karam ki ek nazar mujh pe mera yar kare

karam kī ek nazar mujh pe merā yaar kare

zarā sā chhū ke mujhe phir se mushkbār kare

kise dikhā.ūñ maiñ bikhrā huā vujūd apnā

maiñ kyā karūñ jo tirā dard be-qarār kare

ba-qaul un ke mileñge ba-roz-e-hashr mujhe

batāo kaun qayāmat tak intizār kare

tamāzat-e-ruḳh-e-raushan kī sab ko taab kahāñ

talab ho jis ko fanā kī vo dīd-e-yār kare

Dhalā jo rang meñ saaqī ke mai-kade meñ koī

to us pe apnī 'ināyat vo be-shumār kare

asiir huuñ tirī zulfoñ kā ek muddat se

mujhe nasīb ḳhudā dil kā bhī dayār kare

sahārā tinke kā de kar ke kaash ai 'ahmad'

bhañvar meñ huuñ koī sāhil se ham-kanār kare

karam ki ek nazar mujh pe mera yar kare

zara sa chhu ke mujhe phir se mushkbar kare

kise dikhaun main bikhra hua wujud apna

main kya karun jo tera dard be-qarar kare

ba-qaul un ke milenge ba-roz-e-hashr mujhe

batao kaun qayamat tak intizar kare

tamazat-e-ruKH-e-raushan ki sab ko tab kahan

talab ho jis ko fana ki wo did-e-yar kare

Dhala jo rang mein saqi ke mai-kade mein koi

to us pe apni 'inayat wo be-shumar kare

asir hun teri zulfon ka ek muddat se

mujhe nasib KHuda dil ka bhi dayar kare

sahaara tinke ka de kar ke kash ai 'ahmad'

bhanwar mein hun koi sahil se ham-kanar kare