jalwa hai tera aalam-e-anwar ki surat

jalva hai tirā 'ālam-e-anvār kī sūrat

ham ḳhāk-nashīñ haiñ tire bīmār kī sūrat

hai koī masīhā na hī ġham-ḳhvār kī sūrat

taskīn-e-dil-e-zār hai bas yaar kī sūrat

ik 'umr se furqat kī sazā kaaT rahā huuñ

paidā hī nahīñ hotī hai dīdār kī sūrat

kyuuñ jashn manā.eñ na bhalā aaj ke din bhī

din terī vilādat kā hai tehvār kī sūrat

ye rasm-e-zamāna hai ki ab bazm-e-vafā meñ

apne bhī milā karte haiñ aġhyār kī sūrat

ho hijr kā 'ālam na koī baat na yādeñ

ik din to mile ham ko bhī itvār kī sūrat

furqat kī kaḌī dhuup meñ bhī saath mire hai

ab yaad tirī sāya-e-dīvār kī sūrat

koshish to hai 'mushtāq' ki hoñ mere suḳhan bhī

'ġhālib' kī ġhazal 'mīr' ke ash'ār kī sūrat

jalwa hai tera 'alam-e-anwar ki surat

hum KHak-nashin hain tere bimar ki surat

hai koi masiha na hi gham-KHwar ki surat

taskin-e-dil-e-zar hai bas yar ki surat

ek 'umr se furqat ki saza kaT raha hun

paida hi nahin hoti hai didar ki surat

kyun jashn manaen na bhala aaj ke din bhi

din teri wiladat ka hai tehwar ki surat

ye rasm-e-zamana hai ki ab bazm-e-wafa mein

apne bhi mila karte hain aghyar ki surat

ho hijr ka 'alam na koi baat na yaaden

ek din to mile hum ko bhi itwar ki surat

furqat ki kaDi dhup mein bhi sath mere hai

ab yaad teri saya-e-diwar ki surat

koshish to hai 'mushtaq' ki hon mere suKHan bhi

'ghaalib' ki ghazal 'mir' ke ash'ar ki surat