jab bhi main tera ye chehra dekhta hun

jab bhī maiñ terā ye chehra dekhtā huuñ

chehra us meñ sirf apnā dekhtā huuñ

āñkheñ terī yuuñ to gahrī haiñ bahut par

jitnā dikh paatā hai utnā dekhtā huuñ

aaj shāyad maiñ nahīñ huuñ terā lekin

ḳhud ko ik din terā hotā dekhtā huuñ

dekh kar tum āñkhoñ meñ merī kisī din

dekhnā ye ki maiñ kyā kyā dekhtā huuñ

tujh se pahle tīrgī meñ mar rahā thā

tere aane se ujālā dekhtā huuñ

duniyā ye mere liye ab mar chukī hai

so maiñ tujh meñ apnī duniyā dekhtā huuñ

baa'd muddat ke mile ho tum mujhe par

muddatoñ kā tum se rishta dekhtā huuñ

jab bhi main tera ye chehra dekhta hun

chehra us mein sirf apna dekhta hun

aankhen teri yun to gahri hain bahut par

jitna dikh pata hai utna dekhta hun

aaj shayad main nahin hun tera lekin

KHud ko ek din tera hota dekhta hun

dekh kar tum aankhon mein meri kisi din

dekhna ye ki main kya kya dekhta hun

tujh se pahle tirgi mein mar raha tha

tere aane se ujala dekhta hun

duniya ye mere liye ab mar chuki hai

so main tujh mein apni duniya dekhta hun

ba'd muddat ke mile ho tum mujhe par

muddaton ka tum se rishta dekhta hun