zindagi kis ki ata hai is dayar-e-mir mein

zindagī kis kī 'atā hai is dayār-e-mīr meñ

saañs lenā bhī sazā hai is dayār-e-mīr meñ

sar salāmat hai magar dil meñ ye kaisī karbalā

saf-ba-saf mātam bichhā hai is dayār-e-mīr meñ

zāhirī asbāb se dil jiit sakte haiñ magar

is meñ ḳhatra jaan kā hai is dayār-e-mīr meñ

bas ye ik ḳhāna-purī hai karte rahiye dastaḳhat

pūchhiye mat kyā ḳhatā hai is dayār-e-mīr meñ

vaqt kī jādū-garī se hai 'ajab manzar yahāñ

sub.h kaisī shaam kyā hai is dayār-e-mīr meñ

tishnagī kā aisā 'ālam haiñ du'ā.eñ be-asar

lamha lamha karbalā hai is dayār-e-mīr meñ

'mīr' jī aur sāhab-e-taqdīr bhī rote mile

shahr-e-dil girya huā hai is dayār-e-mīr meñ

zindagi kis ki 'ata hai is dayar-e-mir mein

sans lena bhi saza hai is dayar-e-mir mein

sar salamat hai magar dil mein ye kaisi karbala

saf-ba-saf matam bichha hai is dayar-e-mir mein

zahiri asbab se dil jit sakte hain magar

is mein KHatra jaan ka hai is dayar-e-mir mein

bas ye ek KHana-puri hai karte rahiye dastaKHat

puchhiye mat kya KHata hai is dayar-e-mir mein

waqt ki jadu-gari se hai 'ajab manzar yahan

subh kaisi sham kya hai is dayar-e-mir mein

tishnagi ka aisa 'alam hain du'aen be-asar

lamha lamha karbala hai is dayar-e-mir mein

'mir' ji aur sahab-e-taqdir bhi rote mile

shahr-e-dil girya hua hai is dayar-e-mir mein