dasht-dar-dasht aks-e-dar hai yahan

dasht-dar-dasht aks-e-dar hai yahāñ

tum bhī aao ki merā ghar hai yahāñ

phailtī jā rahī hai surḳh lakīr

jaise koī lahū meñ tar hai yahāñ

dhuup se bach ke jaa.eñ aur kahāñ

apnī zaat ik ghanā shajar hai yahāñ

vahī miTTī hai sab ke chehroñ par

aa.ina sab se bā-ḳhabar hai yahāñ

shāḳh-dar-shāḳh ek saaya hai

chāñd jo hai pas-e-shajar hai yahāñ

Duub kar jis meñ apnī thaah milī

lamha lamha vahī bhañvar hai yahāñ

pattharoñ meñ hazār chehre haiñ

haañ magar koī tīsha-gar hai yahāñ

kuchh mujhe bhī yahāñ qarār nahīñ

kuchh tirā ġham bhī dar-ba-dar hai yahāñ

zahr kī kaaT kis se ho 'aḳhtar'

vaqt kā marg-e-neshtar hai yahāñ

dasht-dar-dasht aks-e-dar hai yahan

tum bhi aao ki mera ghar hai yahan

phailti ja rahi hai surKH lakir

jaise koi lahu mein tar hai yahan

dhup se bach ke jaen aur kahan

apni zat ek ghana shajar hai yahan

wahi miTTi hai sab ke chehron par

aaina sab se ba-KHabar hai yahan

shaKH-dar-shaKH ek saya hai

chand jo hai pas-e-shajar hai yahan

Dub kar jis mein apni thah mili

lamha lamha wahi bhanwar hai yahan

pattharon mein hazar chehre hain

han magar koi tisha-gar hai yahan

kuchh mujhe bhi yahan qarar nahin

kuchh tera gham bhi dar-ba-dar hai yahan

zahr ki kaT kis se ho 'aKHtar'

waqt ka marg-e-neshtar hai yahan