parda-e-chashm mein le kar tera jalwa jaun

parda-e-chashm meñ le kar tirā jalva jā.ūñ

maiñ dil-e-zarra meñ bhī anjuman-ārā jā.ūñ

mujh pe kyā jāniye kyā ho asar-e-mauj-e-bahār

maiñ ki sarsar ke bhī jhoñkoñ se nikhartā jā.ūñ

maiñ ki huuñ ā.ina-e-chīn-e-jabīn-e-daurāñ

sat.h-e-dariyā kī tarah bantā bigaḌtā jā.ūñ

kis ko fursat hai ki ho sairafī-e-ḳhvesh-o-‘adū

abr-e-rahmat kī tarah sab pe barastā jā.ūñ

maiñ vo aazar huuñ ki tartīb-e-nazar se apnī

pattharoñ par tirī tasvīr banātā jā.ūñ

maiñ isī soch meñ us bazm se mahrūm rahā

koī armāñ bhī ho ham-rāh ki tanhā jā.ūñ

jū-e-kohsār kī mānind huuñ maiñ bhī shāyad

naġhme sunsān chaTānoñ ko sunātā jā.ūñ

dasht-e-hasrat ho ki sahrā-e-tamannā 'sādiq'

maiñ bagūle kī tarah sab se guzartā jā.ūñ

parda-e-chashm mein le kar tera jalwa jaun

main dil-e-zarra mein bhi anjuman-ara jaun

mujh pe kya jaaniye kya ho asar-e-mauj-e-bahaar

main ki sarsar ke bhi jhonkon se nikharta jaun

main ki hun aaina-e-chin-e-jabin-e-dauran

sath-e-dariya ki tarah banta bigaDta jaun

kis ko fursat hai ki ho sairafi-e-KHwesh-o-‘adu

abr-e-rahmat ki tarah sab pe barasta jaun

main wo aazar hun ki tartib-e-nazar se apni

pattharon par teri taswir banata jaun

main isi soch mein us bazm se mahrum raha

koi arman bhi ho ham-rah ki tanha jaun

ju-e-kohsar ki manind hun main bhi shayad

naghme sunsan chaTanon ko sunata jaun

dasht-e-hasrat ho ki sahra-e-tamanna 'sadiq'

main bagule ki tarah sab se guzarta jaun