ye kya shadid aziyyat hai kaisa dard hai yar

ye kyā shadīd aziyyat hai kaisā dard hai yaar

ki fasl-e-gul meñ bhī chehra hamārā zard hai yaar

maiñ is liye bhī tire sāmne nahīñ rotā

ki merī zaat se mansūb lafz mard hai yaar

jo apne gaañv kā sab se sharīf laḌkā thā

vahī to dasht-e-mohabbat kā rah-navard hai yaar

mire hī shauq-e-talab se hai mas.ala sab ko

vagarna vasl kā tālib har ek fard hai yaar

maiñ us kī garm-nigāhī se ho gayā mahrūm

so mere jism kā har hissa aaj sard hai yaar

jise ye ahl-e-nazar sang-e-mīl kahte haiñ

yaqīn kar vo mire rāste kī gard hai yaar

koī to shīsh-mahal meñ bhī nā-sipās rahā

kisī ke sar pe faqat charḳh-e-lājvard hai yaar

ye kya shadid aziyyat hai kaisa dard hai yar

ki fasl-e-gul mein bhi chehra hamara zard hai yar

main is liye bhi tere samne nahin rota

ki meri zat se mansub lafz mard hai yar

jo apne ganw ka sab se sharif laDka tha

wahi to dasht-e-mohabbat ka rah-naward hai yar

mere hi shauq-e-talab se hai masala sab ko

wagarna wasl ka talib har ek fard hai yar

main us ki garm-nigahi se ho gaya mahrum

so mere jism ka har hissa aaj sard hai yar

jise ye ahl-e-nazar sang-e-mil kahte hain

yaqin kar wo mere raste ki gard hai yar

koi to shish-mahal mein bhi na-sipas raha

kisi ke sar pe faqat charKH-e-lajward hai yar