wo apne chahne walon ke darmiyan se uTha

vo apne chāhne vāloñ ke darmiyāñ se uThā

vahāñ se baat na aage chalī jahāñ se uThā

vo dūsroñ ke liye apnī jaan kyuuñ detā

na apnā dard bhī jis yār-e-mehrbāñ se uThā

ham apnī aag meñ jal bujh ke raakh ho bhī chuke

vo aaj pūchh rahe haiñ dhuāñ kahāñ se uThā

tirā 'itāb-e-nazar ham to sah ga.e lekin

zamīn kaañp ga.ī shor āsmāñ se uThā

bahut dinoñ se jo kahnā thā un se keh aa.e

balā kā bojh thā jo aaj jism-o-jāñ se uThā

ham aap apnī nigāhoñ meñ ho ga.e rusvā

thā ik hijāb kā parda so darmiyāñ se uThā

har ek baiTh gayā apne apne saa.e meñ

na bār-e-ham-safarāñ mīr-e-kārvāñ se uThā

ye soz-e-'ishq bhī hai dard-e-mushtarak hī nahīñ

jalā hai koī dhuāñ mere āshiyāñ se uThā

har ek chiiz purānī dikhā.ī dene lagī

makīñ 'jamīl' jab apne na.e makāñ se uThā

wo apne chahne walon ke darmiyan se uTha

wahan se baat na aage chali jahan se uTha

wo dusron ke liye apni jaan kyun deta

na apna dard bhi jis yar-e-mehrban se uTha

hum apni aag mein jal bujh ke rakh ho bhi chuke

wo aaj puchh rahe hain dhuan kahan se uTha

tera 'itab-e-nazar hum to sah gae lekin

zamin kanp gai shor aasman se uTha

bahut dinon se jo kahna tha un se keh aae

bala ka bojh tha jo aaj jism-o-jaan se uTha

hum aap apni nigahon mein ho gae ruswa

tha ek hijab ka parda so darmiyan se uTha

har ek baiTh gaya apne apne sae mein

na bar-e-ham-safaran mir-e-karwan se uTha

ye soz-e-'ishq bhi hai dard-e-mushtarak hi nahin

jala hai koi dhuan mere aashiyan se uTha

har ek chiz purani dikhai dene lagi

makin 'jamil' jab apne nae makan se uTha