na-jaane dard hain kitne hamare sine mein

na-jāne dard haiñ kitne hamāre siine meñ

magar hai kitnā maza in ke saath jiine meñ

ye naav biich bhañvar meñ pahuñch ga.ī kaise

zarūr koī munāfiq hai is safīne meñ

kahāñ thī itnī chamak is haqīr patthar meñ

basā huā hai tirā jalva is nagīne meñ

hamāre zaḳhm ko chhoTā sā jānñe vaale

ye zaḳhm bhar nahīñ saktā hai sau mahīne meñ

abhī se dil meñ tum aane kī aarzū na karo

abhī hai zindagī itnī kahāñ qarīne meñ

jamāl-e-yār kī doshīzgī qayāmat hai

'ajīb ḳhush-bū samāne lage pasīne meñ

nuzūl-e-rahmat-e-bārī se pur-sukūñ sab haiñ

isī liye hai tamannā rahūñ madīne meñ

'ajīb chiiz hai siine meñ bhī ye dil 'amjad'

chhupe hue haiñ ka.ī raaz is dafīne meñ

na-jaane dard hain kitne hamare sine mein

magar hai kitna maza in ke sath jine mein

ye naw bich bhanwar mein pahunch gai kaise

zarur koi munafiq hai is safine mein

kahan thi itni chamak is haqir patthar mein

basa hua hai tera jalwa is nagine mein

hamare zaKHm ko chhoTa sa jaanne wale

ye zaKHm bhar nahin sakta hai sau mahine mein

abhi se dil mein tum aane ki aarzu na karo

abhi hai zindagi itni kahan qarine mein

jamal-e-yar ki doshizgi qayamat hai

'ajib KHush-bu samane lage pasine mein

nuzul-e-rahmat-e-bari se pur-sukun sab hain

isi liye hai tamanna rahun madine mein

'ajib chiz hai sine mein bhi ye dil 'amjad'

chhupe hue hain kai raaz is dafine mein