mustaqil dard ki lazzat chahi

mustaqil dard kī lazzat chāhī

dil-e-be-tāb ne ulfat chāhī

us kā ġham pūchh sako to pūchho

jis ne marne kī masarrat chāhī

dil kī hangāma-pasandī tauba

phir vahī shorish-e-vahshat chāhī

apnī rusvā.ī pe ab shākī hai

dil thā dīvāna ki shohrat chāhī

tū to har ek ko apnātā gayā

aur maiñ ne tirī ulfat chāhī

kitne hangāme uThe haiñ dil meñ

jab bhī taskīn kī sūrat chāhī

jis meñ har dard samā jaa.e 'azīz'

dil meñ ham ne vahī vus'at chāhī

mustaqil dard ki lazzat chahi

dil-e-be-tab ne ulfat chahi

us ka gham puchh sako to puchho

jis ne marne ki masarrat chahi

dil ki hangama-pasandi tauba

phir wahi shorish-e-wahshat chahi

apni ruswai pe ab shaki hai

dil tha diwana ki shohrat chahi

tu to har ek ko apnata gaya

aur main ne teri ulfat chahi

kitne hangame uThe hain dil mein

jab bhi taskin ki surat chahi

jis mein har dard sama jae 'aziz'

dil mein hum ne wahi wus'at chahi