kitne anjaan ho rahe hain hum

kitne anjān ho rahe haiñ ham

dhuup sar pe hai so rahe haiñ ham

shāyad ab qadr-e-zindagī ho dost

ġham se mānūs ho rahe haiñ ham

kal jo boyā thā aaj kaaTā hai

kal jo kāTeñge bo rahe haiñ ham

zulmatoñ ko siyāh-baḳhtī kī

raushnī meñ samo rahe haiñ ham

muskurā.ī sahar kiran phūTī

husn-e-afsāna ho rahe haiñ ham

ġham ke motī chune the jo dil ne

āñsuoñ meñ piro rahe haiñ ham

ye bhī jiine meñ koī jiinā hai

taare hañste haiñ ro rahe haiñ ham

raat mastoñ meñ pās-e-hosh bhī thā

zindagī tujh ko kho rahe haiñ ham

aañkh khulte hī ye huā mā'lūm

maut kī niiñd so rahe haiñ ham

abr-e-rahmat uThā baras bhī gayā

sar-e-dāman hī dho rahe haiñ ham

kitne anjaan ho rahe hain hum

dhup sar pe hai so rahe hain hum

shayad ab qadr-e-zindagi ho dost

gham se manus ho rahe hain hum

kal jo boya tha aaj kaTa hai

kal jo kaTenge bo rahe hain hum

zulmaton ko siyah-baKHti ki

raushni mein samo rahe hain hum

muskurai sahar kiran phuTi

husn-e-afsana ho rahe hain hum

gham ke moti chune the jo dil ne

aansuon mein piro rahe hain hum

ye bhi jine mein koi jina hai

tare hanste hain ro rahe hain hum

raat maston mein pas-e-hosh bhi tha

zindagi tujh ko kho rahe hain hum

aankh khulte hi ye hua ma'lum

maut ki nind so rahe hain hum

abr-e-rahmat uTha baras bhi gaya

sar-e-daman hi dho rahe hain hum