KHun ke ghunT kai bar piye hain maine

ḳhuun ke ghūñT ka.ī baar piye haiñ maiñ ne

ik javānī meñ ka.ī 'ishq kiye haiñ maiñ ne

husn vāloñ se rafīqoñ se raqīboñ se mujhe

jitne bhī zaḳhm mile ḳhud hī siye haiñ maiñ ne

sach to ye hai jo tire saath nahīñ guzre haiñ

kitnī mushkil se vo lamhāt jiye haiñ maiñ ne

jis kī furqat ne kahīñ kā nahīñ chhoḌā mujh ko

vo samajhtā hai use dhoke diye haiñ maiñ ne

haq-bayānī kī sazā.eñ bhī bahut kaaTī haiñ

bevafā.ī ke bhī ilzām liye haiñ maiñ ne

KHun ke ghunT kai bar piye hain main ne

ek jawani mein kai 'ishq kiye hain main ne

husn walon se rafiqon se raqibon se mujhe

jitne bhi zaKHm mile KHud hi siye hain main ne

sach to ye hai jo tere sath nahin guzre hain

kitni mushkil se wo lamhat jiye hain main ne

jis ki furqat ne kahin ka nahin chhoDa mujh ko

wo samajhta hai use dhoke diye hain main ne

haq-bayani ki sazaen bhi bahut kaTi hain

bewafai ke bhi ilzam liye hain main ne