hijr ke sare azabon se guzar jaana hai

hijr ke saare 'azāboñ se guzar jaanā hai

ham ne is baar use dekh ke mar jaanā hai

lā ke dorāhe pe vo chhoḌ gayā hai mujh ko

aa ke batlā.e ki ab maiñ ne kidhar jaanā hai

dil kī kyā pūchhte ho ranj to ghar hai is kā

ye koī zaḳhm nahīñ hai jise bhar jaanā hai

TuuT jaanā hai ḳhayāloñ ne ḳhabar hai mujh ko

mujhe mā'lūm hai ḳhvāboñ ne bikhar jaanā hai

she'r kahtā huuñ ab us shoḳh kī farmā.ish par

'aib thā merā jise us ne hunar jaanā hai

vā'da-e-vasl ko sach maan liyā hai maiñ ne

aur pahle kī tarah us ne mukar jaanā hai

āḳhrī faisla kar ke palaT aanā hai 'zafar'

haañ agar us ne pukārā to Thahar jaanā hai

hijr ke sare 'azabon se guzar jaana hai

hum ne is bar use dekh ke mar jaana hai

la ke dorahe pe wo chhoD gaya hai mujh ko

aa ke batlae ki ab main ne kidhar jaana hai

dil ki kya puchhte ho ranj to ghar hai is ka

ye koi zaKHm nahin hai jise bhar jaana hai

TuT jaana hai KHayalon ne KHabar hai mujh ko

mujhe ma'lum hai KHwabon ne bikhar jaana hai

she'r kahta hun ab us shoKH ki farmaish par

'aib tha mera jise us ne hunar jaana hai

wa'da-e-wasl ko sach man liya hai main ne

aur pahle ki tarah us ne mukar jaana hai

aaKHri faisla kar ke palaT aana hai 'zafar'

han agar us ne pukara to Thahar jaana hai