hae meri qismat ne khel kaisa khela hai
haa.e merī qismat ne khel kaisā khelā hai
ek dil hai mahfil meñ ek dil akelā hai
kyā 'ajab tamāshā hai kyā 'ajab zamāna hai
jo nahīñ kisī laa.iq us ke saath melā hai
ik hasīn laḌkī ne mujh se sīdhe-sāde ko
'ishq ke samundar meñ jaan kar dhakelā hai
mahfiloñ meñ hañstā huuñ maslahat hai ye varna
ashk ab nahīñ aate dard itnā jhelā hai
'ishq ho gayā tum se ye kahe hai dil mujh se
tum mujhe na samjhāo dil baḌā haTelā hai
ai 'nizām' tauba hai 'ishq se mirī tauba
muskurāhaTeñ kam haiñ is meñ bas jhamelā hai
hae meri qismat ne khel kaisa khela hai
ek dil hai mahfil mein ek dil akela hai
kya 'ajab tamasha hai kya 'ajab zamana hai
jo nahin kisi laiq us ke sath mela hai
ek hasin laDki ne mujh se sidhe-sade ko
'ishq ke samundar mein jaan kar dhakela hai
mahfilon mein hansta hun maslahat hai ye warna
ashk ab nahin aate dard itna jhela hai
'ishq ho gaya tum se ye kahe hai dil mujh se
tum mujhe na samjhao dil baDa haTela hai
ai 'nizam' tauba hai 'ishq se meri tauba
muskurahaTen kam hain is mein bas jhamela hai
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
